ភ្នំពេញ៖យោងតាមទិន្នន័យដែលចេញផ្សាយដោយអគ្គនាយកដ្ឋានគយនិងរដ្ឋាករកម្ពុជារយៈពេល៩ខែឆ្នាំ២០២២នេះការធ្វើពាណិជ្ជ កម្មរវាងកម្ពុជា និងទីផ្សារអន្តរជាតិ សម្រេចបានទឹកប្រាក់ជាង ៤១ពាន់លានដុល្លារ កើនឡើង១៨% បើធៀបនឹងរយៈពេលដូចគ្នាកាលពីឆ្នាំមុន ដែលមានតម្លៃជាង ៣៤ពាន់លានដុល្លារ។
ពីខែមករា ដល់ខែកញ្ញា កម្ពុជាបាននាំចេញទំនិញផ្សេងៗក្នុងតម្លៃជាង ១៧ពាន់លានដុល្លារកើនឡើង២២.១% ក្នុងនោះដៃគូពាណិជ្ជកម្មចម្បងរបស់កម្ពុជាគឺសហរដ្ឋអាមេរិកដែលកម្ពុជាបាននាំចេញទៅប្រទេសនេះក្នុងទំហំជាង៧ពាន់លានដុល្លារកើនឡើង២៩.៤%,រីឯជប៉ុនតម្លៃ ៨៩៧លានដុល្លារកើនឡើង ៨.៥%, ប្រទេសកាណាដាចំនួន ៨៧៤លានដុល្លារកើនឡើង ២២.២%និង ប្រទេសចិនតម្លៃ ៨៩៥លានដុល្លារកើនឡើង ។
ទន្ទឹមគ្នានេះដែរ ក្នុងរយៈពេល៩ខែនេះ កម្ពុជាបាននាំចូលទំនិញពីដៃគូពាណិជ្ជកម្មមួយចំនួនមកវិញ ក្នុងតម្លៃជាង ២៣ពាន់លានដុល្លារ កើនឡើង១៥.២%។ ប្រទេសចិន បាននាំចូលទំនិញមកកម្ពុជាច្រើនជាងគេក្នុងតម្លៃជាង៧.៩ពាន់លានដុល្លារកើនឡើង១៤.១%, ប្រទេសថៃជិត ៣ពាន់លានដុល្លារកើនឡើង ២៥.១%, ប្រទេសវៀតណាមជាង ៣ពាន់លានដុល្លារកើនឡើង ៣៤.៥%, សិង្ហបុរី តម្លៃជិត ៣ពាន់លានដុល្លារថយចុះ ២១.៨% និងតៃវ៉ាន់ក្នុងតម្លៃជាង ៨១៧លានដុល្លារកើនឡើង ១៤.៥%។
ទំនិញដែលកម្ពុជានាំចេញច្រើនជាងគេ គឺសម្លៀកបំពាក់មានតម្លៃជាង ៧ពាន់លានដុល្លារ, ម៉ាស៊ីន និងឧបករណ៍អគ្គិសនី តម្លៃជាង ១២០០លានដុល្លារ, ស្បែកជើងតម្លៃជាង ១៣០០លានដុល្លារ, វត្ថុធ្វើពីស្បែក និងរោមសត្វជាង ១៤០០លានដុល្លារ និងទំនិញផ្សេងៗទៀតដូចជាធញ្ញជាតិ គ្រឿងសង្ហារឹម កៅស៊ូ បន្លែ ផ្លែឈើជាដើម៕ដោយៈសិរីមតី
